O'zbekistonda dasturiy mahsulotlarning mahalliy bozorini rivojlantirish, davlat organlari va mahalliy korxonalarda eng zamonaviy axborot texnologiyalarni rivojlantirish masalalariga katta e'tibor qaratilmoqda.
Bu faoliyatdagi asosiy yo'nalishlardan biri dasturiy mahsulotlar ishlab chiqarish, axborot tizimlari va texnologiyalarini joriy qilish bo'yicha yirik xorijiy kompaniyalarni jalb qilish hisoblanadi.
Koreyaning “LG CNS” kompaniyasining boy tajriba va keng imkoniyatlarga egaligini hisobga olib, “LG CNS Uzbekistan” O'zbekiston-Koreya qo'shma korxonasi yaratildi.
O'zbekistonda 14 sentyabrdan boshlab o'tkazilayotgan Axborot-kommunikatsiya texnologiyalari haftaligi doirasida korxonaning rasmiy ochilish marosimi bo'lib o'tdi.
Qo'shma korxona faoliyatining asosiy yo'nalishi bo'lib dasturiy mahsulotlarni ishlab chiqarish, qurilmaviy-dasturiy majmualarni o'rnatish va tatbiq qilish, “Elektron hukumat” va iqtisodiyotning real sektori korxonalari uchun loyihaviy va texnik hujjatlashtirishni shakllantirishdan iborat.
“LG CNS Uzbekistan” korxonasi loyihalarni amalga oshirishda mahalliy kompaniya va ishlab chiqaruvchilar bilan hamkorlik qilish va ularni jalb qilishni rejalashtirmoqda. Bu esa o'z navbatida axborot texnologiyalari mahalliy bozorini rivojlantirishga ijobiy ta'sir ko'rsatadi.
Ayni paytda qo'shma korxona “Elektron hukumat” tizimining yirik loyihalarini amalga oshirishni boshladi. Bu loyihalar zamonaviy axborot tizimlari va davlat muassasalari ma'lumotlar bazasini va interaktiv davlat xizmatlarini tatbiq qilish uchun ishonchli infratuzilmani shakllantirishni ta'minlaydi.
