30-may kuni Xitoyning Nankin shahrida Shveysariyaning quyosh batareyalarida ishlovchi Solar Impulse 2 samolyoti start oldi, deya xabar bermoqda Look At Me.
Reja bo‘yicha samolyot faqat quyosh energiyasidan quvvat olgan holda 8172 km masofani bosib o‘tadi. Parvoz 120 soat vaqt olishi kerak. So‘nggi manzil — Gavayi orollaridagi Kalaeola. Shundan so‘ng Solar Impulse 2 Feniksga 4694 kilometrlik sayohatni amalga oshiradi. Jami 12 ta parvoz amalga oshiriladi, ular yonilg‘isiz uchadigan samolyotda qilingan birinchi dunyo bo‘ylab sayohatni tashkil etadi. U iyulda Abu-Dabida nihoyasiga yetadi.
Solar Impulse 2 o‘tgan yilning aprelida taqdim etilgan, iyunida esa sinovlardan muvaffaqiyatli o‘tgan edi. Uning qanotlari qulochi 72 metr, og‘irligi 2,3 tonnaga teng. Samolyot qanoti 17,2 mingta quyosh batareyalari bilan qoplangan. Samolyotning maksimal tezligi soatiga 140 kilometrni tashkil etadi.
