Rossiya kutubxonalari o‘zlarining elektron ensiklopedik resursini yaratishmoqchi; u “Vikipediya”ga raqobatchi bo‘lishi kutilmoqda. Bu tashabbusni Sankt-Peterburgdagi Prezident kutubxonasi olimlar kengashi yig‘ilishida Rossiya milliy kutubxonasi bosh direktori Anton Lixomanov ma’lum qildi, deb yozadi “ITAR-TASS”.
“Rossiyaning yirik milliy kutubxonalari o‘z elektron axborot resurslarini yaratish ustida o‘ylasalar bo‘lar edi”, – dedi Lixomanov.
Yig‘ilish qatnashchilari ta’kidlashicha, dunyodagi eng ommabop elektron kutubxonada juda ko‘p noaniqliklar mavjud. Buning ustiga, “geosiyosatga aloqador ko‘plab faktlar unda noxolis aks ettirilishi hollari uchraydi”. Bu haqda Rossiya Prezident kutubxonasining ijtimoiy aloqalar va ommaviy axborot bo‘yicha direktori Valentin Sidorin ma’lum qilgan.
Prezident kutubxonasi bosh direktori Aleksandr Vershinin milliy elektron ensiklopedik resurs yaratish fikrini qo‘llab-quvvatladi. U bu borada ish allaqachon boshlanganini eslatib, unga qaytish va shu yo‘nalishni davom ettirish lozimligini ta’kidladi. O‘tgan yilning oxirida Prezident kutubxonasi “Rossiya hududiy ensiklopediyalari” portalini yaratishda ishtirok etishini ma’lum qilgan edi. Portal hududlar hayotining turli jihatlari haqidagi bosma ma’lumotnomalarni birlashtirishi lozim edi.
