Jamoat transportlarini routerlar bilan jihozlash boʻyicha loyiha mualliflari — Evo hamda "Toshshahartransxizmat” kompaniyalari rahbarlari dastlabki sinov bosqichi muvaffaqiyatli yakunlangani sabab, ikkinchi sinov bosqichi davomida routerlar avtobuslardan olib tashlanishi haqida xabar qilishdi. Bu haqda Evo operatori rasmiy saytida taʼkidlangan, deb yozadi "Sputnik News".
"Sinovning ikkinchi bosqichida avtobuslarda bepul internet — Wi-Fi ishlamaydi", deyiladi xabarda.
Bepul Wi-Figa ega ilk avtobuslar Toshkentda fevral oyi boshida paydo boʻlgan edi. Mutaxassislar sinovning dastlabki bosqichi muvaffaqiyatli yakunlangani haqida taʼkidlashmoqda.
Sinovning yakuniy bosqichi mart oyi oxirigacha oʻtkazilishi kutilmoqda.
2016 yil yakuniga qadar poytaxtdagi barcha avtobuslar routerlar bilan jihozlanishi kutilmoqda. Internet 4G LTE texnologiyasi yordamida ulashilmoqda. Yoʻlovchilar fikriga koʻra, Wi-Fi tezligi shikoyatga oʻrin qoldirmaydi. Tarmoqqa ulanish uchun parol shart emas.