Turkiya chempionati 22-turida “Galatasaroy” hamda “Trabzonspor” jamoalari o‘rtasidagi uchrashuvda mehmonlar himoyachisi Solih Dursun uchrashuv bosh hakamiga qizil kartochka ko‘rsatgani uchun maydondan chetlatildi. Bu haqda “Chempionat” xabar bermoqda.
O‘yinning 86-daqiqasida bosh hakam Deniz Bitnel “Trabzonspor” himoyachisi Luis Kavanduga to‘g‘ridan-to‘g‘ri qizil kartochka ko‘rsatib, maydondan chetlatdi. Hakamning qo‘lidan tushib ketgan kartochkani mehmonlar himoyachisi Solih Dursun ko‘tarib oldi va uni hakamga ko‘rsatdi. Deniz Bitnel ikkilanmay Dursunni ham o‘yindan chetlatdi.
“Galatasaroy”ning 2:1 hisobidagi g‘alabasi bilan yakunlangan o‘yinda “Trabzonspor”ning jami 4 futbolchisi maydondan chetlatilgan.
“Trabzonspor” hakamning qaroridan norozi ekanini namoyish qilish maqsadida Dursunning hakamga qizil kartochka ko‘rsatayotgan vaziyatning suratini futbolkalarga tushirib, klub do‘konlarida sotishni rejalashtirgan.
