Yaponiyada saratonga qarshi kurashuvchi yangi vosita – dori vositalarini bevosita o'simtaga yetkazib bera oluvchi nanomashinalarni klinik sinovlardan o'tkazishning oxirgi bosqichi boshlandi . Bu haqda Mainichi gazetasi xabar bermoqda.
Yangi qurilma asosida kasal hujayralarni quritib yuboradigan tsisplatin vositasini tashib yuruvchi makromolekulalardan foydalanish printsipi yotadi. Saraton to'qimalarida qon tomirlari dori vositasiga ega kapsulalarni o'tkaza oladigan ko'plab teshiklarga ega. Bundan tashqari, xatarli o'simtalarning ichida yuqori darajadagi kislotalik mavjud bo'lib, bu o'simtani bexato aniqlash va uning ichidagi mikroskopik sig'imlar ichidagi toksik moddalarni tashqariga chiqarish imkon beradi. Ixtirochilarning ta'kidlashicha, bunda nanomashinalar normal to'qimalarga zarar etkazmaydi.
Sisplatin anchadan buyon o'pka, prostata bezi, tuxumdonlar va oshqozon saratoni bilan kurashishda foydalaniladi, biroq u jiddiy ikkinchi darajali effektlarga ham ega. Nanomashinalar ushbu vositani aniq manzilli ishlatishga va shu tariqa organizmga ziyon etkazishdan qochishga imkon beradi.
Ushbu texnologiya ixtirochisi, Tokio universiteti professori Kataoka Kadzunorining ta'kidlashicha, nanomashinalar jarrohlik operatsiyaning o'rnini bosa olmasa ham, biroq ulardan onkologiya retsidivi (takrorlanishi) xavfini kamaytirish va metastazalar bilan kurashishda keng foydalanish mumkin.
Biroq olimning Yaponiya davlat onkologiya markazida ishlovchi hamkasbi bu nanomashinalar borasida ortiqcha optimizmga berilmaslikdan ogohlantirmoqda. “Yangi ixtirodan saratonni to'liq davolaydigan mo''jizaviy ta'sir qiluvchi dori kabi effekt kutish yaramaydi”, deb aytmoqda professor Yasuxiro Matsumura. Uning aytishicha, yangi texnologiyaning ustunligi uning ikkinchi darajali effektlarni kamaytirishidan iborat.