Yaponiyalik paleontologlar Fukui prefekturasida joylashgan Katsuyama shahri yaqinida yangi turdagi dinozavrning qoldiqlari topilganini tasdiqladi. Bu haqda “TASS” xabar bermoqda.
Fukui universiteti va Paleontologiya muzeyi xodimlari xulosasiga ko‘ra, qoldiqlar 120 million yil oldin yashagan ikki oyoqli yirtqich teropodlar kenja otryadiga mansub dinozavrga tegishli.
Professor Yeiti Adzumaning so‘zlariga qaraganda, bu Yaponiya hududidan topilgan yettinchi dinozavr skeletidir.
Dinozavrlarning yangi turi bo‘yin umurtqalarining boshqa teropodlarga xos bo‘lmagan tuzilishi tufayli Fukuivenator paradoxus – “Fukuilik paradoksal ovchi” deb nomlandi.
O‘z turdoshlariga nisbatan, pat bilan qoplangan dinozavrning tanasi uncha katta bo‘lmagan. Uning og‘irligi taxminan 25 kilogramm, uzunligi esa 2,5 metr bo‘lgan.
Taxminlarga ko‘ra, bu tur boshqa teropodlar qushlarga aylana boshlaganida yashagan, ammo u evolyutsiyada qushlar bosqichiga o‘ta olmagan.
Manba
