Las-Vegasda davom etayotgan CES-2016 ko'rgazmasida insonlarni tashishga mo'ljallangan yirik hajmli Ehang 184 droni namoyish etildi. Ehang kompaniyasi vakillarining ta'kidlashicha, Personal Flying Vehicle (PFV – shaxsiy uchuvchi harakat vositasi) nomli mazkur uskuna shu yildan sotuvga chiqariladi.
To'rt qo'lli va sakkiz parrakli ushbu 184 uskunasi bir kishini ko'tara oladi. Shu bilan birga, dronni yo'lovchining o'zi boshqara olmaydi, dron aynan masofadan, boshqa joydan boshqariladi.
Gadjet 3 ming m balandlikka ko'tarilishi, 100 km/soat tezlikka chiqishi mumkin. U konditsionerga, 4G-modemga va katta displeyga ega; yo'lovchidan tashqari, uning bortiga bitta ryukzakni sig'dirish mumkin. Agar dron kursdan adashsa, avtomatik tarzda favqulodda qo'nishni amalga oshiradi.
EHang AQShda barcha 184 modellarini boshqarishning yagona markazini qurishni rejalashtirmoqda. Dron narxi 200-300 ming dollarga baholanmoqda.
