Chevrolet kompaniyasi Ford’ning xot-xetchlari yoki Subaru BRZ bilan raqobatlashishi mumkin bo‘lgan kompakt sportkar ishlab chiqmaslikka qaror qildi. Bu haqda, General Motors’ning mahsulotlar bo‘yicha vitse-prezidenti Mark Reyssga asoslanib, Automotive News xabar bermoqda.
GM top-menejeri so‘zlariga ko‘ra, bunday avtomobillarni ishlab chiqish uchun iqtisodiy asos yo‘q. Uning qayd etishicha, bu kabi mashinalar savdosi uzoq vaqt faol davom etmaydi. Bundan tashqari, bunday avtomobillarning narxi o‘zidan bir toifa baland mashinalarnikiga juda ham yaqin.
“Xot-xetch yoki kompakt sportkar ishlab chiqish biz uchun qanchalik muhim – masala shunda. Hozir bizda bu avtomobillarga zarurat yo‘q. Har doim ham shunday bo‘lib qoladimi? Bunday demagan bo‘lardim”, – dedi Reyss.
Hozirgi vaqtda Chevrolet’ning modellar qatorida faqat bitta “kuchaytirilgan” xetchbek – Sonic RS bor. Bu avtomobil 138 ot kuchiga ega 1,4 litr hajmdagi turbo dvigatel, olti bosqichli mexanik yoki olti diapazonli “avtomat” uzatmalar qutisi bilan ta’minlangan.
Chevrolet’ning sport modellari qatorida esa uch xil avtomobilni ko‘rish mumkin. Bular – 420 ot kuchiga ega SS sedani, 466 ot kuchiga ega V8 dvigatel o‘rnatilgan Corvette superkari va yangi avlod Camaro kupelardir.
