Suriyaning Xasaka viloyatidagi Rumaylanda o‘tgan syezdda ishtirok etgan 30 dan ortiq siyosiy partiya a’zolari mamlakat shimolida mintaqaviy federativ ma’muriyat tashkil etilganini rasman e’lon qildi. Bu haqda, “Firat” agentligiga asoslanib, “TASS” xabar bermoqda.
“Demokratik federativ Suriya — xalqlarning birgalikdagi hayoti va birodarligi kafolati” shiori ostida o‘tgan forumda 200 delegat ishtirok etdi. Ular orasida Suriyaning shimoliy va shimoli-sharqiy qismida yashovchi kurdlar, arablar, turkmanlar, ossuriyaliklar, cherkeslar va armanilarning vakillari bor.
G‘arbiy Kurdiston (Rojava) tashqi ishlar direksiyasining rasmiy vakili Idris Na’son bu qarorga izoh berarkan, kurdlarning Suriyaga geografik e’tirozlari yo‘qligini bildirdi.
“Shimoliy federativ hudud Suriyaning bir qismi bo‘lib qolaveradi”, — dedi u.
Shuningdek, Na’son Jenevadagi muzokaralar natijalariga ko‘ra tuziladigan hukumat tarkibiga kurdlarning vakillari ham kirishini aytib o‘tdi.
O‘z navbatida, Suriya TIV tarqatgan maxsus bayonotda federallashuv bilan bog‘liq har qanday masalani ko‘tarish mamlakatning hududiy yaxlitligiga daxl qilishga tenglashtirilib, konstitutsiyaga va xalqaro qonunchilikka zid harakat sifatida ko‘rilishi ta’kidlanadi.
“Bu yo‘nalishdagi har qanday bayonot qonuniy kuchga ega bo‘lmay, yuridik, iqtisodiy va ijtimoiy natijalar keltirmaydi, negaki Suriya xalqining niyati va maqsadini aks ettirmaydi”, — deyiladi hujjatda.
Turkiya tashqi ishlar vazirligi ham vaziyatga shu pozitsiyadan turib baho bermoqda.
Manba
