Barak Obama ma’muriyati Kubaga Amerikaning Guantanamo harbiy bazasini qaytarib bermoqchi emas, biroq u yerda terrorchilar uchun tashkil qilingan maxsus qamoqxonani tugatishni rejalashtirmoqda. Bu haqda AQSh mudofaa vaziri Eshton Karter Kongressning vakillar palatasidagi 2017-moliya yili uchun harbiy byudjet bo‘yicha eshitishlar chog‘ida so‘zlagan nutqida aytib o‘tdi, deb yozadi “TASS”.
Qonun chiqaruvchilardan birining savoliga javob berar ekan, u ma’muriyatning Guantanamo bazasini Kubaga berish bo‘yicha “hech qanday rejalari yo‘q”ligiga ishontirdi.
“Gap faqat bitta obyektni yopish haqida bormoqda”, — dedi Karter, bu, uning aniqlik kiritishicha, 2001-yilda “Al-Qoida” guruhiga qarshi kampaniya boshlanganidan so‘ng tashkil qilingan terrorchilar uchun maxsus turmadir.
Shu hafta avvalrog‘ida Pentagon Kongressga ayni paytda 91 kishi saqlanadigan ushbu turmani tugatish rejasini yo‘naltirgan edi. AQSh ma’muriyati mahbuslarning uchdan birini boshqa mamlakatlarga topshirmoqchi, qolganlarini esa Amerika hududidagi boshqa qamoqxonalarga ko‘chirmoqchi.