Toyota korporatsiyasi xavfsizlik kamarlarida aniqlangan muammolar tufayli dunyo bo‘ylab 2,87 million dona avtomobilini chaqirib oladi. Bu haqda Reuters bergan ma’lumotlarga asosan “RBK” xabar qilmoqda.
Ma’lum qilinishicha, avtomobilga o‘rnatilgan kamarlar yo‘l-transport hodisasi ro‘y berganda o‘rindiqning temir karkaslariga tegib zarar ko‘rishi mumkin.
2005-yil iyul oyidan 2014-yil avgust oyiga qadar ishlab chiqarilgan va dunyo bo‘ylab sotilgan RAV4 SUV rusumli mashinalar hamda 2005-yil oktabr ― 2016-yil yanvar oylari davomida Yaponiyada sotilgan Vangurad rusumli avtomashinalar chaqirib olinadi.
Chaqirib olinadigan jami 2,87 millionta avtomobildan 1,4 milliontasi Shimoliy Amerikaga, 625 mingtasi Yevropaga, 434 mingtasi Xitoyga, 177 mingtasi Yaponiyaga va 307 mingtasi boshqa hududlarga to‘g‘ri kelmoqda.
Eslatib o‘tamiz, Toyota Motor Corp. kompaniyasi oyna ko‘targichlarini boshqaruvchi moslamada aniqlangan muammolar tufayli, dunyo bo‘ylab 6,5 millionta avtomobilni, shu jumladan, Corolla modellarini ham chaqirib olayotgani xabar qilingan edi.
